مقال بعنوان: خيار وفقوس
وأكيد في بلاد كتيرة بتعتبر حالها فقوس وبتدلل حالها، وإحنا يا حسرة خيار الغلابة؛ بس عادي مش كل خيار خيار في منه ما بنفع إلا مخلل وفي منه ما بنفع إلا لطبخة محشي الخيار، بس أكثر الناس بعرفوا الخيار بالسلطة وهو أكيد أطيب ما في السلطة، أما عنا إحنا الفلاحين بنحب الخيار قرط وكل قرطة بنسميها خمشة وما بدك تعرف إنه إللي قارط خيار بلدي بتشم ريحته من ثاني وادي، وعلى سيرة الوديان الخيار سلطان الوادي، وادي الناطوف في منطقة الرملة مطرح أول مرة زرعوا الخيار بالدنيا كلها؛ قبل هيذ كان الخيار يطلع بالخلا بفصل الربيع، والناس كانت تلقطه مع العكوب، والبنات كانن يحطن لبن الخيار؛ اللي بيطلع من قمع لخيارة؛ على جروحهن من شوك العكوب.
أما الفقوس فأصله غوراني من ناحية الدوايمة تحت البحرة؛ اللي هسعيات بتقولوا إلها البحر الميت الله يموت عدوينكم؛ وهاظا الفقوس كانوا ما يحبوا يوكلوه بس كانوا يطعموه للحمير بعيد عن السامعين؛ ولما الحمار يوكل فقوس بصير يحرث الأرض أحسن من الثور، بس وين ووين تتلاقي فقوس مزروع محدش كان يزرعه؛ ولما زرعوا الفقوس بطبرية هجنوه بخيار وصار اسمه مقتي وهذا المقتي زاكي كثير مخلل؛ ومش عاطل قرط؛ بس أصل القرط هو للخيار البلدي أبو ريحة.
وهلقيت صار لازم نحكي ليش بنحكي خيار وفقوس لأنه الخيار دايم دوم الحول والفقوس بزورنا بالربيع وبوكله اللي معه يدفع حقه، أما الخيار فهو أبو الغلابة وفي متل تاني عن مناداة الدلالة بسوق عكا أيام العثمانيين: يا خيار يا فاكهة الشحاذين ويا فقوس يا أزكى من بوس العذارى! صار لازم نعرف إنه الخيار هو أول شغلة طلب الاسكندر المقدوني بعد ما احتل فلسطين، إنها تنزرع في أثينا بعد ما ذاقها في الرملة؛ بس هو ما أكلها قرط لع أكلها بسلطة اسمها السلطة الجذامية وهي خيار بقشره وبصلة شومر وورق ثوم أخضر مفرومين ومغطسين بلبن معزة وعليهن ملح جبلي وزيت زيتون.
خالد غنام أبو عدنان
ولدت لاجئاً وأحيا مهاجراً
9/12/2017
